最好的一週

用左三日時間打爆左,當然係Miss左好多劇情咁打爆,因為公測就黎完,返HK電腦又唔好,先至趕住咁打爆。玩左幾日已經好想買正版,因為creak唔到。唔知點解呢輪DOWN親D GAME都creak唔到。唔知係部腦問題定係我問題,不過呢,我都係D鐘意買正版既人,有一種擁有既感覺。當然LA,最好就係其他人買左正版借我玩……HAHA。如果唔係呢,就要等我搵到工、搵到屋、買過部勁D既電腦……可能已經出左第三集~~XD 不過呢隻game令我覺得大學四年無玩,無打魔獸,係一種損失。

星期六放工之後,都係繼續打starcraft2,同時唸下點解中國人出唔到隻咁既game。點解中文game可以咁爛,係爛到……無眼睇……是但LA~~等我第時真係有機會搞呢樣先再講。
話說我打到10點半,突然間小砰打電話比我…呃,skype囉,唔知算唔算電話,條友已經用緊iphone4囉。佢話佢係火車站,我O左嘴,問佢,下?你唔係去左台東咩?做咩會係台南?佢話唔想去LU,想同我去阿里山。咁撚PK……= = 結果個晚同佢吹水吹到2點幾3點,第二朝起身佢又話,唔去LU,載我去高鐵站,搭高錢返台北……頂佢= =
話時話今日去阿里山,呢個行程唔知點解由開始計劃個時已經好不安,計劃好曬,房都BOOK埋,都仲係好不安。我都唸唔明點解,明明都無咩野,以前自己一個返大陸都唔會咁,一個人黎左TW都唔會咁……等等等等,今次明明去玩,無咩負擔,但依然係咁,真係……唔知點算好。唔唸咁多LA~~希望玩得開心D就好。
但係其實都覺得自己求其左好多,成日帶漏野,又成日唔記得野。好似上次同大B去台北咁,居然唔記得帶牙刷。呢D野換轉20歲之前,我係無可能會發生囉,絕對絕對無可能發生囉,真係唔知點解會咁,都無辦法,唉…好唔鐘意自己做野成日咁多呢D野,唔記得左又唔記得右,但呢件事真係發生係我身上……好似前幾日拆部機咁,我應該重新再燒一次D野先再出拆機,但係覺得太多,最後都係無,剩係燒左D最重要既文件檔。之前話要搵個新既黎COPY D野落去,最後都係無咁做……愈黎愈多野想做但無做到…點解會咁…好鬼憎自己,都係死左佢算。
話時話,今日出門口個時開阿祖部腦,突然發現佢部腦開機彈左個run.dll找不到既畫面。我O左嘴,有無搞錯,星期5晚用,裝左隻game,尋日爆左就delete左,都無事。今日如常開機上網,突然爆D咁既野出黎?但係都好正常下,應該無事掛……
查實我都幾驚,唔知點解搞親人地部腦都有事。明明我用同一個方法搞自己部腦,但係又無事。D野照計都係裝黎裝去拆黎拆去。黎TW之前,對上個部腦我用左8年,天殘地缺囉dvd rom又壞,D ram呀線呀又成日鬆,無LALA開唔到機又要重頭插過曬佢。所以係我既使用經驗話比我知,要解決電腦既問題只有兩個方法,重新裝過windows,重新插過D野,兩樣都唔得就買過部。
不過老實呀,我用自己部腦,通常都得,如果唔係上一部點樣用到8年咁耐?但係用人地部腦就唔知點解唔得,仲會成日出意外。比如上年幫阿神整電腦,其實我都係重新插過曬D野。之後同佢拎去整個時,電腦舖個老闆話,佢個hardisk比人硬拔過,插頭爛爛地。矛頭就一野指向我。查實我個時係發現佢部機漏電,個hardisk又插得太實,無拔到出黎。只係改左hardick後面D針位,換左用活死人個個黎開windows。點知連活死人個個都死埋……但明明我拎過自己個個咁樣係阿DICK部腦到試過,好成功架BOR~~點解會咁呢?仲有一次仲神奇,前幾個月係舖頭,照常咁關門。第二日返到去,部腦開唔到,嚇死我,大佬!我咩都無做過WO~~後尾證實係壞軌……電腦呢家野同人腦一樣,愈精密愈容易壞。但電腦係機器,可以換左佢。人唔係,人無得換、無得修、無得format無得整……
當然LA~~呢D野發生係其他人身上可能係好小事。上星期睇酪梨壽司, 佢可自己按一個Print既制就可以整壞部電腦,超級誇張。但女人又唔同,好似係呢D野上面有特權咁,比如唔識整電腦呀,唔小心整壞左部腦呀,呢D野係好平常可以容忍。換左男人晨早比人睇唔起加鬧爆……又或者換左女人唔識煮飯洗衫又會比男人覺得有無搞錯(anyway,呢個已經係上世紀既觀念,新時代女人識洗衫煮飯=無能,叫佢洗碗佢可以大聲鬧︰你當我賓賓呀!)。「以為」呢個觀念,或者又係一個無辦法解決的問題。嗯,咁又可以好好咁寫返篇文。
唔知LA~~算LA~~走LA~~無仇報~~都係個句,返HK飲飲食食然後等死…… 唔知做咩事,無LALA打打下文都想死,釋然、放鬆、relax,無事既,唔洗驚……係人都會生,係人都會死,唔好咁急住去投胎,仲有大把時間大把日子,等住我。

留言